2017年8月6日星期日

大街新建臨時建築物與未來活動

大街酒店舊址嘅工程, 擬似係詭夢實驗室今年嘅所在地.

呢個結構睇落並唔似係短期嘅臨時建築物, 可能會好似展藝館咁可以容納更多不同形式嘅活動. 假如香港迪士尼仲有心搞好節日活動.....

嚟緊幾年嘅活動處於一個更重要嘅位置. 因為樂園有多個工程進行.

2018年嘅香港迪士尼會失去城堡同煙花匯演, 廣場嘅工程亦有可能輕微影響到巡遊. 而巴斯理應有起碼半年時間處於改裝嘅狀態. 越遲改裝完畢即代表樂園嘅空檔期越長.

通往Arendelle (2020) 嘅新入口加上改裝幻想世界火車站嘅外觀, 仲有Avengers (2023) 嘅工程亦會影響埋樂園鐵路嘅運作.

Iron Man 雷聲大雨點小, 對SHIELD 嘅期待度並唔大; 而Moana 可以幫到嘅亦唔會太多. 首個真正能夠帶動人流同引起注意嘅擴建項目, 相信係新Castle.

新Castle 建成之前, 香港迪士尼好需要更強大更吸引嘅節日活動.

純幻想 - Tomorrowland 與Marvel Land

香港迪士尼一連起幾個Marvel 設施, 好多朋友都擔心Tomorrowland 會從此被Marvel 侵蝕, 得返一個太空山並唔能再稱為明日世界. 但其實換個方式諗, 有冇可能係園方刻意要建造多一個園區出嚟呢? 而依家只不過係一個過程?

由Avengers 嘅Concept Art 可以睇到:
1. Avengers 設施範圍只去到太空山前, 似乎並唔會用晒馳車成塊地
2. 火箭餐廳嘅外觀都有少少改變

假設呢個角落嘅幾個設施連埋火箭餐廳都係Marvel 主題, 其實Marvel 呢個區域已可以伸延到去Hub. 咁咪即係一個Disneyland 正常園區嘅規劃?

照呢個方向諗, 巴斯光年咁受歡迎都要改做SHIELD 就似乎變得較合情理, 因為佢處於呢個分離計劃嘅核心位置.

馳車天地餘下嘅半塊地如果用嚟做Tomorrowland 嘅擴建, 再加埋太空山後面將來發展埋, 明日世界唔會比依家細.

咁都唔係太差.

香港迪士尼獨一無二的山景與Arendelle

東京迪士尼海洋同香港迪士尼先後公佈增建Arendelle.  兩個咁近嘅樂園要起同一主題嘅園區, 香港迪士尼有咩優勝之處?

Arendelle 係一個好特別嘅國家, 除咗係一個海邊嘅小國, 佢背後仲被群山包圍住. 而香港迪士尼建Arendelle 嘅位置背後一河之隔... 正正就有座天然嘅山.

Small World, Arendelle 同Toy Story Land 同樣位於鐵路外, 喺地形上佢哋應該處於相近嘅level. 如果TSL 同Small World 都睇到座山, 兩者之間嘅Arendelle 都會睇到.

由Toy Story Land Rex 嗰邊嘅入口望過去會見到座山, 而其實小小世界只要行到火車橋之前都仍然會見到座山, 只不過Small World 座show building 太高同當你行得太近時視覺上就會完全遮住.

由此推論, Arendelle 個湖 (海) 嘅作用, 可能就係要將你同Arendelle Castle 保持一定距離, 而後面呢座天然嘅background 又會再次為香港迪士尼製造出廣闊嘅空間感.

有一座天然嘅山並唔足夠, 喺Concept Rendering 已見到香港版嘅Arendelle 會有已被冰封嘅North Mountain (仲有Elsa 座Ice Palace) , 另一邊Sleigh Ride 嘅外觀同樣會係一座山.

就係咁.... Arendelle 被群山包圍嘅情景就得以重現.

Toy Story Land 幅相嘅來源: https://goo.gl/wdKn6i

飛天巡遊原構思

大家睇咗咁多年飛天巡遊, 但你知道呢個巡遊嘅原本構思中, Dumbo 同Mickey 係同一架花車嗎? Dumbo 會喺半空飛翔, 示意佢拉動緊Mickey 架飛船.

飛躍奇妙製作特輯中就有出現呢架車嘅原設計.
https://youtu.be/TY-5HBQpVsA

估計係呢個設計喺物理上有好大嘅挑戰, 所以就出現依家大家睇到嘅版本.

Disney Hollywood Hotel

繼Hong Kong Disneyland Hotel 同Explorers Lodge 後, 最後嚟到Hollywood Hotel.

Explorers Lodge 係最新最有度假感覺, Disneyland Hotel 可見到歲月嘅痕跡但仍然好華麗, 而Hollywood Hotel 就偏向簡約.

雖然經過12年, Fans 們對佢嘅印象都係好多旅行團入住同好嘈, 繼而將Hollywood 定型為較差嘅酒店, 但撇除入住賓客嘅國藉, 試想像如果呢間酒店係位於美國嘅Disney Resort 而大堂換上當地嘅賓客, 你就會覺得其實Hollywood Hotel 嘅氣氛並唔差.

間酒店本身係冇問題. 事實上, Hollywood 嘅色彩設計, 外觀以至裝飾都保持到一間Disneyland Resort Hotel 應有嘅水平.

用Classic Mickey Minnie 真係好靚.